ເມືອງ ວາປີ ໄດ້ຈັດພິທີປະຖະກະຖາວັນສ້າງຕັ້ງກໍາມະບານລາວ ຄົບຮອບ 65 ປີ.

ໃນວັນທີ 23 ກຸມພາ 2021 ສະຫະພັນກຳມະບານເມືອງ ຮ່ວມກັບຄະນະໂຄສະນາອົບຮົມເມືອງວາປີ ໄດ້ຈັດພິທີປາຖະກະຖາວັນສ້າງຕັ້ງກໍາມະບານລາວ ຄົບຮອບ 65 ປີ (1 ກຸມພາ 1956-1 ກຸມພາ 2020) ທີ່ສະໂມສອນໃຫຍ່ຂອງເມືອງ ໃຫ້ກຽດເຂົ້າຮ່ວມຮັບຟັງຂອງທ່ານຄະນະປະຈຳພັກເມືອງ,ກຳມະການພັກເມືອງ, ມີຫົວຫນ້າ ແລະ ຮອງຫ້ອງການ, ພະນັກງານ ລັດຖະກອນ ແລະ ສະມາຊິກກໍາມະບານຮາກຖານໃນທົ່ວເມືອງວາປີ ເຂົ້າຮ່ວມ.

     ໃຫ້ກຽດຂື້ນບັນຍາຍເອກະສານ ໂດຍທ່ານ ນ. ຕຽງຄຳ ສິດທິຈັກ ອະດິດ ຄະນະປະຈໍາພັກເມືອງ ຜູ້ຊີ້ນໍາວຽກງານອົງການຈັດຕັ້ງມະຫາຊົນ ທ່ານ ໄດ້ຍົກໃຫ້ເຫັນເຖິງການກໍາເນີດ ແລະ ເຕີບໃຫຍ່ຂະຫຍາຍຕົວຂອງອົງການຈັດຕັ້ງກໍາມະບານລາວກ່ອນປົດປ່ອຍ ແລະ ຫຼັງປົດປ່ອຍ, ພ້ອມດ້ວຍມູນເຊື້ອອັນດີງາມ ໃນໄລຍະຜ່ານມາຂອງອົງການຈັດຕັ້ງກໍາມະບານລາວ ໂດຍສະເພາະກໍແມ່ນການປະກອບສ່ວນໃນການປົກປັກຮັກສາ ແລະ ພັດທະນາສ້າງສາປະເທດຊາດ, ຍາມໃດກົມການເມືອງສູນກາງພັກ, ຄະນະເລຂາທິການສູນກາງພັກກໍ່ໄດ້ເອົາໃຈໃສ່ຢ່າງໃກ້ຊິດຕິດແທດ ແລະ ຕີລາຄາສູງຕໍ່ການຈັດຕັ້ງເຄື່ອນໄຫວວຽກງານຂອງອົງການຈັດຕັ້ງກໍາມະບານລາວ ໃນນາມທີ່ເປັນຕົວແທນແຫ່ງການປົກປ້ອງສິດຜົນປະໂຫຍດອັນຊອບທໍາຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານລາວ ເພື່ອເຮັດໃຫ້ສໍາເລັດຕາມຄາດຫມາຍສູ້ຊົນໃນແຕ່ລະໄລຍະ ໂດຍສະເພາະກໍແມ່ນການປະຕິບັດຕາມມະຕິກອງປະຊຸມໃຫຍ່ຄັ້ງຕ່າງໆຂອງພັກປະຊາຊົນ ປະຕິວັດລາວໃນແຕ່ລະໄລຍະ ເພື່ອເຮັດໃຫ້ປະຊາຊົນຫຼຸດພົ້ນອອກຈາກຄວາມທຸກຍາກໄດ້ເທື່ອລະກ້າວ.

      ຈາກນັ້ນ ທ່ານ ຄຳຟອງ ຈັນທະຈອນ ກຳມະການພັກເມືອງ ປະທານສະຫະພັນກໍາມະບານເມືອງກໍ່ໄດ້ຂື້ນຜ່ານມະຕິກອງປະຊຸມໃຫ່ຍຂອງສະຫະພັນກຳມະບານແຂວງ,ລວມເຖີງຜົນງານ ແລະ ໝາກຜົນທີ່ຍາດມາໄດ້ໃນໄລຍະຜ່ານມາ. ໂດຍເອົາໃຈໃສ່ເພີ່ມທະວີປັບປຸງການຈັດຕັ້ງທຸກຂັ້ນໃຫ້ມີຄວາມເຂັ້ມແຂງ, ເສີມຂະຫຍາຍຫົວຄິດປະດິດສ້າງເຂົ້າໃນການຈັດຕັ້ງປະຕິບັດພາລະບົດບາດ, ໜ້າທີ່ຂອງຕົນ, ຂະຍາຍການຈັດຕັ້ງສະມາຊິກກຳມະບານເຂົ້າສູ່ຫົວໜ່ວຍທຸລະກິດເອກະຊົນ ກໍ່ຄືການລົງທຶນຂອງຕ່າງປະເທດບ່ອນທີ່ບໍ່ທັນມີອົງການຈັດຕັ້ງກຳມະບານ ໃຫ້ນັບມື້ນັບກວ້າງຂວາງ ເພື່ອເຮັດໃຫ້ສະມາຊິກກຳມະບານໄດ້ຮັບການບຳລຸງ, ກໍ່ສ້າງ, ຍົກລະດັບຄວາມຮູ້, ຄວາມສາມາດທາງດ້ານເຕັກນິກວິທະຍາສາດໃຫ້ມີຄຸນນະພາບທີ່ດີຂຶ້ນເປັນກ້າວໆ. 

ອອກ​ຈາກ REPLY ເປັນ

Please enter your comment!
Please enter your name here